Kush është në rrezik për Retinopatinë diabetike?

Diabeti është një sëmundje që ndikon në aftësinë e trupit për të prodhuar ose përdorur insulinën në sasi të mjaftueshme për të kontrolluar nivelin e sheqerit në gjak. Ka tre lloje diabeti: Tipi 1,Tipi 2 dhe Gestacional, i cili mund të zhvillohet kur një grua është shtatzanë.

Tipi 1. Zakonisht diagnostikohet tek fëmijët dhe tek rinjtë dhe më parë quhej edhe diabeti juvenil. Trupi nuk prodhon insulinë.

Tipi 2. Forma më e shpeshtë e diabetit.Trupi nuk prodhon insulinë të mjaftueshme ose qelizat e trupit nuk i përgjigjen insulinës.

Gestacionali. Niveli i sheqerit (glukozës) në gjak rritet gjatë shtatzanisë tek gratë që nuk kanë patur diabet më parë. Diabeti gestacional fillon kur trupi i nënës nuk është i aftë të prodhojë dhe të përdorië tërë insulinën e duhur gjatë shtatzanisë. 

Personat me diabet kanë hiperglicemi, që është sheqeri ose glukoza e tepërt në gjak. Megjithëse glukoza është burimi kryesor i energjisë për të gjitha qelizat e trupit, rritja e vazhdueshme e sheqerit shkakton dëmtime në tërë trupin, duke përfshirë edhe enët e vogla të gjakut tek sytë. Si përfundim, një person me diabet është gjithnjë i ekspozuar ndaj rrezikut të zhvillimit të retinopatisë diabetike, ku dëmtimi për shkak të diabetit ndodh tek enët delikate të gjakut brenda retinës, në pjesën e mbrapme të syrit.

Faktorë rreziku të retinopatisë diabetike:

- Niveli i sheqerit në gjak

Kontrolli i sheqerit tuaj në gjak është faktori kryesor parandalues. Ulja e nivelit të sheqerit në gjak mund të vonojë fillimin dhe të ngadalësojë zhvillimin e retinopatisë diabetike.

- Presioni i gjakut

Studimet klinike kanë demonstruar se kontrolli i presionit të gjakut ul rrezikun e zhvillimit të retinopatisë si edhe dëmtimin e shikimit. Tensioni i lartë dëmton enët e gjakut, duke shtuar kështu rrezikun e problemeve të syrit. Për shumë pacientë diabetikë tensioni i gjakut duhet të jetë nën 130/80 mmHg.

- Kohëzgjatja e diabetit

Rreziku i fillimit dhe zhvillimit të retinopatisë diabetike rritet me kalimin e kohës. Pas 15 viteve, 80 % e pacientëve me tip 1 zhvillojnë retinopati diabetike. Pas 19 viteve 84 % e pacientëve me tip 2 preken nga retinopatia diabetike.

- Niveli i yndyrnave në gjak (Kolesteroli dhe Trigliceridet).

Niveli i lartë i yndyrnave në gjak mund të shkaktojë akumulim të tepërt të eksudatit, depozitës së proteinave tek retina. Kjo situatë është e shoqëruar me një rrezik më të madh për humbjen e shikimit.

- Shtatzania

Shtatzania mund të shkaktojë ndryshime në sy. Nëse keni diabet dhe mbeteni shtatzanë, rreziku i shfaqjes së retinopatisë diabetike rritet. Dhe nëse keni retinopati diabetike, ajo mund të zhvillohet akoma më shumë. Megjithatë, disa studime kanë treguar se me trajtimin e duhur këto ndryshime janë të kthyeshme pas lindjes dhe nuk ka rrezik në zhvillimin e mëtejshëm të sëmundjes.

Për më shumë informacion kontaktoni në inbox ose në numrat e telefonit 038 221 661 ose 049 513 513

Spitali Amerikan,Përqafoje Jetën!